منووورين والله

بعد يوم صعب وطويل وإمتحان مرير (ماكنش مرير أوي يعني.. لزوم السجع وكلام من ده) كان المفترض إنى أنام بدري عشان أكمل حشو دماغي للإمتحانين الباقيين عشان بعدها أبقى إفراج من السجن التلقيني اللى بنعيشه أيام الامتحانات.. المهم يعني .. قلت أدخل أشيك على الفيس وأطمن على الايميل وأمتع نظري بشكل مدونتي الجديدة (أصلي بحبها يا جدعان) عشان نعمل شويه تظبيطات وتعديلات وحركات نخلي المدونة أكثر سهولة للتصفح والتعليق للقراء الكرام.. فلاقيتنى كده عماله بدعبس (يعني بلعب) فى الإعدادات على أساس يعني أفهم أكتر في كيفية إدارة المدونة الأحمريكا دي॥ فخير اللهم أجعله خير لاقيتنى دخله على الإحصائيات –من غير ما أخد بالي إن هي دي عقر دار الأرقام والإحصائيات- وألاقي قدام عنيا ايه بقى؟؟ إن فى زوار كرام من السعودية والأردن والكويت والعراق وفلسطين والإمارات ولبنان حتى من دولة عمنا أوباما (أمريكا)॥

فحاجه زى دي ماينفعش تعدي مرور الكرام كده.. ولا أنتوا ايه رأيكوا ؟!! وعشان طلتكم المشرقة دي حبيت أبعت لكم أحلى تحية وأفضل سلام.. وتفضلوا على طول منورين كده وتقبلوا مني الورد البسيط ده