فعلا عندي أزمة صعبة عويصة مجعلصة مكعبلة.. أزمة في النوم يا جدعان.. ماتستغربوش.. أنا بس عايزه أعرف حاجه.. هل أنا الوحيدة اللى على وش الكرة الأرضية دي اللى بيحتاج ساعة على الأقل وأحياناً تصل إلى ثلاث ساعات عشان سيادتي تعرف "تتخمد""!!؟؟
بجد حاجه "أوفر" أوي إن ليلة أول يوم امتحان ليا أعد 3 ساعات على السرير صاحيه وأروح الجامعة وأنا شبه مطبقه.. ما وهو أنا مانمتش غير ساعه ونص بس.. ما هو دي مشكلة قومية -على ما أزعم يعني- ولازم نعمل مليونية فى التحرير نطالب فيها وزارة الصحة بإنها تعمل أقراص نوم غير مضرة بالصحة!! أيوة يا جماعة ماتسهونوش بالموضوع.. ده كمان لازم نطالبهم بإنهم يعملوا أقراص تفوق الشخص عشان زي اللى في حالاتي يروحوا الامتحان مركزين.. ما هو مش معقول ندح ونحشي دمغنا بيانات وفي الأخر مانحللش كويس عشان خاطر مافيش أقراص تعمل على تفويق البشـــــر.. الغلابة اللى زي.
سبحان الله.. دنيا لا بتخلي اللى فوق فوق ولا اللى تحت تحت.. مين يا جدعان كان يتوقع إن قبل ما أدخل لجنة الإمتحان بساعتين أكون هنا على المدونة وعمالة أخرف في الكلام بسبب قلة نومي.. بدل ما أعد أراجعلي كلمتين.. يلا إن شاء الله ما حد حوّش...!!!
RSS Feed (xml)
هى صورة النونو دى شفتها فين قبل كدا :)
ReplyDeleteاحم احم... يا فندم الصورة واللى رفعوا الصورة على راسنا من فوق :)
ReplyDeleteربنا ينجحك يارب في امتحاناتك ويوفقك دائما ، والله انا زيك لما باقعد ادرس بانعس ولما اروح الامتحان بيطب عليا النعس ولما اخلص من الامتحانات يبدأ القلق والارق ومعرفش انام خالص ..
ReplyDelete""""
عموما هو هذا جو الامتحانات بيعمل في الواحد هيك ..
:) عندك حق.. هو ده الجو الطبيعي للامتحانات
ReplyDeleteربنا يوفقك ايضا
شكرا على مرورك الكريم :)