مش عارفه ليه، بس فعلا حاسه إنى عايزة أكتب وخلاص، حاسه إن الورقة والقلم وحشونى جدا، فقلت أدخل على مدونتى حبيبتى وأكتب إللى يجى على بالى بكل تلقائية أى كان، أى نعم بقينا بعد نص الليل بس "نو بروبليم" :)
أما اللى جاى على بالى إنى أكتبه بقى هو إنى أخد أجازة نص السنة وده عشان أنا فى عز فترة الإمتحانات اللى تحرق الدم، بجد من أوحش الحاجات اللى فى حياة الانسان هى امتحانات الجامعة أو المدرسة عماة، مفيش نوم، على طول توتر، على طول زهق، على طول ضيق، على مدار أكتر من 14 يوم امتحانات لحد ما خلاااص فطسنا :D
نفسى ربنا يتوب عليا من المذاكرة والامتحانات واخرج للحياة واشتغل واتعلم واخد خبرات واعمل فى مجال ومكانة بحبها، نفسى أحقق حاجات كتيييير أوى من أمنياتى وأحلامى. نفسى أمارس هوياتى اللى مش بلاقى وقت ليها أوى بسبب الدراسة.
نفسى فى إيه تانى؟؟ مممم!!
فى حاجه نفسى فيها أوى وهى حاجه سمعتها فى أغنية من ألبوم سامى يوسف الجديد وهى
I dream for a day.. When there’ll be.. No more misery.. When there’s no more hunger.. No need for shelter.. Isn’t there enough to share..or is that we just don’t care?
I pray for a day.. When there’ll be.. Justice and unity.. Where we put aside our differences.. Fighting makes no sense.. Just a little faith..To make it a better place.. We’re here for a day or two…
كلمات الحقيقة روعة جدا ومعبرة أوى بس سبحان الله، شئ موجود ولابد منه إلى يوم الدين، زى ما فى اللون الأسود والأبيض، لازم يكون فى الخير والشر. عموما نتمنى إن الخير هو اللى يعم ويكون الغالب على الناس حتى لو فى نسبة شر. ومش عارفه ليه جاى فى بالى إنى أكتب عن روعة كتاب قرأته يحمل عنوان "لماذا تقتل يا زيد؟" ؟ يمكن عشان فى حد من الـ "فريندز" ع الفيس بوك عمل "شير" عن الفديو اللى بيتكلم عن الكتاب؟ ممكن وغالبا، بس عماة هو فعلا من أحلى الكتب اللى الواحد ممكن يقرأها، كفاية إنه ساعدنى كتير فى إنى أفهم ولو جزء بسيط عن اللى بيحصل فى العراق. آه ما أنا نسيت أكتب إنه بيتكلم عن قصة حقيقة للمقاومة العراقية.
ممكن تعرفوا تفاصيل عن الفديو من خلال الرابط ده:
جاى فى بالى بردو إنى أشتغل "لوك لوك" عن أهمية ما يسمى بالـ "أمل" فى حياة الإنسان، طبعا أنا أخر واحدة ممكن أفتى فى كلام من النوع ده، وده عشان على رأى اصحابى أنا عندى قاموس ممتلئ من الكلمات الكئيبة، بس مش عارفه ليه حاسة إنه فعلا شئ ضرورى زى المياة و الأكل، حد يجى يسألنى وليه بتتكلمى عن حاجه زى دى؟ أرد وأقول يمكن عشان بهجة قرب أجازة نص السنة إللى مستنيها بنفس قدر إنتظار رجال الحزب الوطنى "الديمقراطى" إنهم يكسبوا الإنتخابات وهم أصلا عارفين إنهم كده كده كسبانين "طبعا مش من خلال التزوير حشى لله" وكفاية على كده بى عشان لا بنتهى بى المطاف إن أهلى يجوا يزرونى بالعيش والحلاوة :))
وأخيرا وليس أخرا "جوود نايت"!! (لو كان فى نصيب :D)
RSS Feed (xml)
على قدر المراره الموجوده بالكتاب وعلى قدر الحزن الموجود بقلوبنا فنحن فى حزن حقيقى بما يحدث فى العراق وفى فلسطين وفى كل الدول العربيه من ظلم بين يعلمه كل انسان ونسال الله عز وجل ان يزيح الظلم من امامنا ولو كره الكافرون
ReplyDeleteسعدت بوجودى بمدونتك وارجوا ان تتقبلى مرورى وتقبلى تحياتى الاحــــــــــــــــــــلام
ونعم بالله وكما انت كاتب فى مدونتك، إن الله لا يغير ما بقوم حتى يغيروا ما بأنفسهم .. الله المستعان
ReplyDeleteشكرا لمرورك الكريم