يعنى إيه حب الأوطان؟!

سؤال سألته لنفسى كتير ، من صغرى ولحد دلوقتى مش لاقيه إجابة "تمس قلبي" ، يعنى إيه حب الأوطان؟

وأنا بسترجع جزء من حياتى وبالتحديد فى المرحلة الإعدادية كانت أمنية حياتى إنى "أطفش" من البلد ومن زحامها وتلوثها وحاجات كتييير ، بعد كده اللى اتمنيته اتحقق ، وعرفت يعنى إيه كلمة "الغربة" وعشتها ثلاث سنوات ، بحلاوتها وبأشواكها ، كان أمل حياتى إنى أرجع أمشى على تراب بلدى تانى وكنت 24 ساعه أسمع أغانى فى حب مصر. وجهة نظرى تجاه بلدى وأنا فى الغربة اختلفت تماماً عن لما كنت فيها ، وكان رأى وقتها "إشمعنى الناس هناك تعبانه فى كل حاجه ، أنا كمان على إستعداد إنى أتعب زيهم ". الحمد لله ، أنا فى الطيارة دلوقتى وكلها ست ساعات بالكتييير وهشوف بلدى ، وأهلى وناسى ، بمجرد ما الطيارة دخلت مصر والأرض من تحتى بدأت تبان معالمها ، وشى فضل لازق فى الشباك ، و وأنا فى المكان العالى ده لاحظت البيوت ، الشوراع ، العربيات ، الجوامع وكان هاين عليا أنط من الشباك وماستناش لما الطياره تهبط ، حقيقى ده كان إحساسى وقتها.

مرت أيام وأسابيع وشهور وأنا إحساسى تجاه مصر لم يتغير ، بعد كده فات أكتر من سنه ، أكتر من سنتين وأنا فى بلدى بس شعورى تجاه بلدى إختلف ، لاقيت الأوضاغ أسوا مما كانت عليه أول ما اتغربت ، الدنيا باقت زحمة أكتر ، الناس باقت أوحش ، الأسعار باقت نار ، الجرائم زادت ، كل بلدان العالم بتتقدم وإحنا بس اللى بنرجع لورا. علشان كده لغاية اللحظة دى وأنا بكتب أنا مش عارفه هل أنا بحب بلدى كما أزعم ولا بس بحبها كلام أغانى من غير ما يكون حب حقيقى. زى ما بيقولو "استفتى قلبك" وحقيقى استفتيت قلبي يجى مليون مرة ولغاية دلوقتى مش لاقية إجابة ، هل أنا بحب مصر؟ وقبل ده يعنى إيه أصلا حب الاوطان؟

اللى يقدر يرسى قلبي على بر ، ياريت يساعدنى!!