الموضوع جوا قلبي ملعبك جداً، بس فعلا زعلانة على نفسي بسبب البهدلة اللي المواطن المصري بيشوفه، والمرمطة في أي حاجه في حياته اليومية، سواء لو في مصلحة حكومية أو راكب مواصلات، أو في شغله/تعليميه.. بتصعب عليا نفسي وأنا المفروض من بني البشر لا نحيا حياة آدمية كما يفترض أن نعيشها. لكن في نفس الوقت زعلانه من نفسي لمّا بلاقي تفكيري نتيجة كل ما سبق هو الهجرة للخارج في دولة تـَعي معنى "تقدير الإنسان". إزاي أكون بتمنى كده والمفروض إن أنا عمري ما أحس بزعل تجاه "أنا كلمة يمكن عمرها عمر البشر ده عام بعام.."؟؟ إزاي نفسي أسيب "اسمي أعظم اسم.."؟؟ ازاي نفسي أسيب بلدي والمفروض إن كل واحد فيها يشتغل علشان يبنيها...؟
إزاي نفسي أسيب بلدي والمفترض إننا نكون بنجهز على قدم وساق ليوم الحسم مع "إسرائيل" من أجل استرداد حقنا في فلسطين، وحق صبرا وشتيلا، وحق محمد الدرة، وحق محمد البرعي وحقوق تانية كتير أوي لم نسترددها بعد؟! إزاي التناقض ده جوايا!!؟؟
إزاي وإحنا بنقول على نفسنا حضارة 7000 سنة مش عارفين نلم شوية زبالة في الشارع.. إزاي وإحنا بنقول على نفسنا حضارة 7000 سنة نلاقي شوية شباب "طايش" -إن جاز التعبير- بشوية موتوسيكلات يعملوا حركات فيعطلوا المرور ومصالح الناس، وإزاي وإزاي..؟؟؟!!! اترسخ جوايا إن العيب مش عيب نظام فحسب إنما عيب شعب، شعب مش عاوز يغيّر من ثقافته.. شعب بيدعي الحضارة ولكنه يفتقد أبسط مقومات تلك الحضارة... زعلانة من بلدي وفي نفس الوقت زعلانه على بلدي..
بدأت أصلح في بلدي من إن أنا أغير من نفسي.. من إن أنا أحاول ابني نفسي صح في مجال دراستي حالياً وعملي مستقبلاً، بس يعتصر قلبي ألماً لمّا أحاول أكلم الناس وأقول لهم لو سمحتوا الصح كذا، فيكون الرد "ببجاحة"ومنتهى في قلة الأدب.. ده بسبب إن الصح دلوقتي أصبح غلط والغلط هو اللي صح، ولو حد اتكلم يبقى فتح على نفسه أبواب عمره ما هيعرف يقفلها..
يا ترى وأنا بقول نفسي اهاجر بره مصر، دي حاجه تفرح إسرائيل؟ أنا إعتقادي آه.. بس أنا أعمل ايه.. أنا بني آدم وحقي أعيش حياة آدمية، لكن في نفس الوقت أنا مش عايزة أكون ثغرة لإسرائيل عشان تفرح فيا وفي بلدي!! يا ترى الحل فين؟؟!!!
ع الهامش: لا أقصد التذمر بشكل كبير كما قد يتبين للقارئ، فأنا أعلم جيداً أن حالي أفضل من ناس كتير، ولكن من أقصده أنه ليس من العيب أبداً أن يكون الفرد طموحاً.
ملحوظة: الكلمات الملونة هى مقتطفات من أغنية "أنا يا إسرائيل" لمغنيها المبدع حمزة نمرة...
RSS Feed (xml)
يارب بكرة نبقي احسن :(
ReplyDeleteلا حبيبتى مش عيب
ReplyDeleteبس التذمر ده يخلينا ندقق هى البلد كانت كده ولا احنا اللى عملنا فيها كده
البلد كانت حضارة لان كان فيها اللى يعمل الحضارة
البلد بقت كده لان ناسها عملوا فيها كده
لو هتسافرى برا هتشوفى تحضر لان اهل البلد عملوا تحضر وانتى هتتطبعى بطبعهم لكن مش هتتقبلى وسطيهم لانهم عارفين انتى جاية منين
دايرة مفرغة حلها اننا نعدل المايله هنا الاول
الله ينصركم على اعداء الاسلام والمسلمين المسببين لكم عدم الاستقرار
ReplyDeleteوالله يقوم مصر مره ثانيه وتكون دوله قويه محافظه على دينها دين الاسلام
قال تعالى :(وَمَنْ يَتَوَكَّلْ عَلَى اللَّهِ فَهُوَ حَسْبُهُ)
توكلي على الله فهو خير معين ي اختي اطلبيه الاستقرار لمصر ولكًِ بارك الله فيك ونفع بك بلادك وبلاد المسلمين اجمعين ...
قال تعالى :( فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِين َ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا)
أكثري من الاستغفار والدعاء لرب العالمين الرحيم الغفور
لابد اختى العزيزه ان تمر مصر بهذه المرحله بعد الثوره العظيمه ولكن لابد ان نخرج من هذه الحاله باقصى سرعه حتى تعود مصر بقوتها لابد ان يعمل كل مصرىويجتهد من اجل الوصول الى محطه الحريه الكامله
ReplyDeleteتحياتى لقلمك الاحــــــــلام
أعرف الكثيرون ممن يفكرون مثلك و ينون الهجرة و أسبابهم منطقيه
ReplyDeleteأتمنى أن تنهى هذه المرحلة سريعا
بالتأكيد .. لم يمر على مصر فى تاريخها كله أسوأ ولا أسود - على كل المستويات - من مرحلة مبارك
ReplyDeleteبدءً من الجهل مروراً بالفقر وانتهاءً بالسلوك ..
لذا .. فبالتأكيد ستكون مصر أفضل بفضل الله ..
ولنعلم .. " إن الله مع الصابرين "
ان شاء الله بكرة احسن وافضل
ReplyDeleteخليك متفائلة وان شاء الله خير
كوني بخير انت ومصر الحبيبة