سنة تانية تدوين

طبعا مضمون كلامي باين من العنوان بس الحقيقة مش بكتب "سنة تانية تدوين" عشان بس فات عليا سنتين في التدوين أو إنى لازم كل سنة أكتنب وأقول سنة كذا تدوين.. إنما قلت أستغل فرصة زي دي عشان أكتب.. بقالى فترة مش قصيرة ما مسكتش ورقة وقلم وده يمكن بسبب بعض المشاغل اللي الواحد لم يعمل لها حسبان.


أما دلوقتي فمش عارفه وأنا بكتب، هل أنا حزينة أم سعيدة؟ يمكن الاتنين في نفس الوقت بسبب بعض الحاجات اللى مديقاني بس اللي متأكده منه إنى على الأقل سعيدة شوية عشان رجعت مسكت الورقة والقلم من جديد اللي فعلا كل يوم والتاني بتأكد ان حقا هما الصديقان اللي مش هلاقي أفضل وأخلص منهما.

فات سنيتن وأنا بدون جوا قلبي قبل ما أدون على الورقة وبالقلم عشان بعد كده قلبي يقرر ايه اللي يخرج وايه اللي يفضل محبوس بالداخل حتي يأتي وقت خروحجه.. وحتى البعض مما خرج كان يخرج مصحوبا بكلام يشوبه الغموض وعدم وضوح الملامح في العبارات، قاصدة بها بعض الأشخاص أحياناً وبعض المواقف أحياناً آخرى.

مابحبش أدون أو أكتب عشان مجرد التدوين، بحس أن لازم يكون في هدف مما أكتبه، لكن فعلا يسود بداخلي حالة من الصمت الرهيب الذى أجهل مصدره ولذلك بمجرد أن سنحت لي الفرصة أن أكتب، قلت أكسر القاعدة وأكتب وخلاص، يمكن بها أخرج من تلك الحالة.

سنة تانية تدوين وكل سنة وأنتم طيبين :)